കാനഡയിൽ ഇന്ത്യൻ വിദ്യാർത്ഥി അക്രമത്തിൽ കൊല്ലപ്പെട്ടു, ഒരു നാടിൻ്റെ നോവായി ഗുർകിരാത്

 

കാനഡയിലെ നോർത്തേൺ ബ്രിട്ടീഷ് കൊളംബിയയിൽ നടന്ന ഒരു അക്രമ സംഭവത്തിൽ ഇന്ത്യൻ വിദ്യാർത്ഥിയായ ഗുർകിരാത് സിംഗ് മനോച്ച കൊല്ലപ്പെട്ടു. ഉന്നത പഠനത്തിനായി 2024 ഡിസംബറിലാണ് ഗുർകിരാത് കാനഡയിൽ എത്തിയത്. അവിടെ മാനേജ്‌മെൻ്റ് സയൻസ് പഠിക്കുകയായിരുന്നു.

കഴിഞ്ഞ മാർച്ച് 13-നായിരുന്നു നാടിനെ നടുക്കിയ സംഭവം. സുഹൃത്തുക്കൾ സഹായം ആവശ്യപ്പെട്ടതിനെ തുടർന്നാണ് ഗുർകിരാത് ചാർലി ലേക്ക് എന്ന സ്ഥലത്തേക്ക് പോയത്. അവിടെ നടന്നൊരു സംഘർഷത്തിനിടെ ഒരാൾ വാഹനം ഗുർകിരാത്തിൻ്റെ നേർക്ക് ഇടിച്ചു കയറ്റുകയായിരുന്നു എന്നാണ് റിപ്പോർട്ട്.

ഉടൻ തന്നെ സുഹൃത്തുക്കൾ ആശുപത്രിയിൽ എത്തിച്ചെങ്കിലും ആ ജീവൻ രക്ഷിക്കാനായില്ല. സംഘർഷത്തിനിടെ ഒരാൾ മരിച്ച കാര്യം പോലീസ് സ്ഥിരീകരിച്ചിട്ടുണ്ട്.  മാതാപിതാക്കളുടെ വലിയ പ്രതീക്ഷയായിരുന്നു ഗുർകിരാത്. മരണവാർത്തയറിഞ്ഞ ഗുർകിരാത്തിൻ്റെ അമ്മ ബോധരഹിതയായി വീണതിനെത്തുടർന്ന് ചികിത്സ നൽകേണ്ടി വന്നു. മകൻ്റെ വിദ്യാഭ്യാസ വായ്പ തിരിച്ചടയ്ക്കാനും മറ്റുമായി കുടുംബം ഇപ്പോൾ ഒരു 'ഗോ ഫണ്ട് മീ' ക്യാമ്പയിൻ ആരംഭിച്ചിട്ടുണ്ട്. ഫോർട്ട് സെൻ്റ് ജോൺ മേയർ കുടുംബത്തെ അനുശോചനം അറിയിച്ചു. സംഭവത്തെക്കുറിച്ച് എന്തെങ്കിലും വിവരങ്ങൾ അറിയുന്നവർ പോലീസുമായി ബന്ധപ്പെടണമെന്ന് കുടുംബം അഭ്യർത്ഥിച്ചു.